Незвычайнае віншаванне з Новым годам са старажытнага Полацка

“Ад Полацка пачаўся свет!”

Мы цудоўна памятаем гэтыя словы Уладзіміра Караткевіча і вырашылі звязаць апошні ў адыходзячым годзе рэпартаж са старажытнейшым горадам нашай краіны. Мы шукалі аптымістычны варыянт віншавання суайчыннікаў і ўбачылі здымкі турыстаў з клуба “Байдарачнікі Полаччыны”.

У суботу 26 снежня яны завяршылі водны сезон вандроўкай па Дрысе да горада Верхнядзьвінска, а ў нядзелю мы запрасілі самых смелых сабрацца на беразе Дзвіны паміж Сафійскім саборам і Музеем беларускага кнігадрукавання.

Надвор’е было цудоўным.

Кіраўнік клуба Ігар Загрэкаў узнагародзіў самых актыўных турыстаў.

І ў гэты момант да полацкіх аматараў водных падарожжаў завіталі Дзед Мароз і Снягурка.

Аказалася, дзед з унучкай таксама з’яўляюцца прыхільнікамі актыўнага адпачынку!

Фота на памяць усім калектывам.

І – наперад!

У розныя бакі расплываюцца качкі і вельмі выразна пазірае на зімовых турыстаў-воднікаў супрацоўнік выратавальнай службы…

Але паход пачынаецца, полацкія байдарачнікі падыходзяць да Сафійскага сабору.

Вось так выглядала Дзвіна, вуліца Ніжне-Пакроўская і Верхні замак у снежні 2017 года.

Яшчэ больш выразным мне падаецца панарамнае відэа вакол Сафійскага сабора.

Снежань 2020 года, на Дзвіне байдарачнікі Полатчыны.

“Дзе Сафія плыве над Дзвіною…” Гэта таксама словы Уладзіміра Караткевіча. З вады велічны сабор сапраўды падобны на белы карабель…

Звяртаем увагу на галоўных герояў нашага падарожжа.

Але не забываем і пра самых маленькіх турыстаў-воднікаў.

Яны сапраўдныя героі! І разам са сваімі бацькамі юныя палачане віншуюць усіх суайчыннікаў з Новым годам!