Белая сініца перамагла ў “птушыных праймерыз” і пазмагаецца за званне птушкі 2022 года

Скончылася анлайн-галасаванне за інтэрнет-кандыдата на званне птушкі 2022 года. У “птушыных праймерыз” перамагла адна з самых рэдкіх сініц Еўропы. Каб паназіраць за ёй, на Палессе прыязджаюць турысты з замежжа.

Белая сініца. Фота Андрэя Шэўчыка

Белая сініца набрала 203 галасы, усяго ж у галасаванні ўдзельнічала 658 чалавек.

Вынікі птушыных праймерыз

Віды для анлайн-галасавання прапаноўвалі праз адкрытую гугл-форму. Андрэй Шэўчык з Палесся – адзін з тых, хто прапанаваў уключыць у спіс “праймерыз” “чырванакніжную” белую сініцу. 

— Адметнасць гэтай птушкі не толькі ў яе прыгажосці і рэдкасці, — патлумачыў ён. — Гэта даволі даверлівая птушка. І, нягледзячы на тое, што яна даволі доўга жыве побач з чалавекам, застаецца мала вывучаным відам.

Белая сініца. Фота Андрэя Шэўчыка

Андрэй звяртае ўвагу на асноўныя пагрозы для віду: выпальванне трысняговых зараснікаў — найважнейшых месцаў для зімоўкі гэтай птушкі; знікненне поймавых дуброў, дзе гняздуе шмат белых сініц; знішчэнне вялікіх вербаў; пагрозы ад рэалізацыі планаванага воднага шляху Е40.

Белыя сініцы. Фота Андрэя Шэўчыка

— Вельмі прыемна, што так шмат людзей аддалі свае галасы за белую сініцу, — кажа Андрэй. — Гэта сведчыць не толькі аб тым, што наш кандыдат прыгожы знешне, але і аб тым, што людзі неабыякава ставяцца да яго далейшага лёсу на тэрыторыі Беларусі.

Белая сініца. Фота Андрэя Шэўчыка

Белая сініца будзе змагацца за званне птушкі 2022 года са скапой і звычайнай туркаўкай – кандыдатамі ад Цэнтральнага савета і сакратарыята АПБ. Хто гэтае званне атрымае, таемным галасаваннем праз пошту вызначаць сябры АПБ. Яны атрымаюць бюлетэні для галасавання, адзначаць на іх свой выбар і дашлюць іх назад у офіс АПБ. У жніўні збярэцца камісія, якая ўскрые канверты і падлічыць галасы ў прысутнасці незалежных назіральнікаў, працэс будзе зняты на відэа. Абвяшчэнне птушкі 2022 года адбудзецца ў лістападзе.

Источник: ptushki.org